S’incuntè por ćiantè deboriada
Na ostaria toćia y plëna a La Pli de Mareo à orü n pü’ cuché ite tl liber nü dla Uniun di Ladins Val Badia "Ćiantè ladin en compagnia", y inće spo nen ćiantè deplü deboriada. Salüt da pert dl presidënt nü dl’Uniun di Ladins Michael Moling y presentaziun di laûrs che à portè al liber da pert de André Comploi.
Publicaziuns - "Ćiantè ladin en compagnia - Ćianties a öna y döes usc por ladin" é le titul dl liber nü, gnü fora bele l’ann passè. Edituria: Uniun di Ladins Val Badia, manajadus dl proiet: Iarone Chizzali, André Comploi, Tone Gasser y Bruno Rives. En sabeda, ai 22 de novëmber, dales sis da sëra é la racoiüda de 175 ćianties por ladin gnüda presentada tla Ostaria Sotrù a La Pli.
I manajadus dl proiet
Responsabli por l’ediziun musicala é Iarone Chizzali, André Comploi y Bruno Rives. Tone Gasser à fistidié dantadöt por i tesć y i indesc. Bruno Rives à trascrit y digitalisé les notes, Stephan Ploner à realisé le layout y l’impaginaziun dl liber. Werner Pescosta, presidënt da denant dla ULVB, à daidé coordiné le proiet y s’à cruzié dles chestiuns organisatives.
Na buna saù al liber ti dà sambëgn i bi depënć de Lois Irsara. Insciö röiel tl blanch y fosch dla notaziun musicala val’ momënt da corù danter un n capitul alfabetich y l’ater intoronan la parüda estetica.
La prejentaziun a La Pli garatada
Cun i dis cörć dl tert altonn se dejidrëion da jì te stüa, stè n pü’ adöm y tignì inće aurela cörta. Avisa de chësc vers ćiara chësta publicaziun, meton sambëgn laprò les parores y le sentimënć ladin. Sce al n’ê laôta ai tëmps de n Jepele Frontull püćes y degönes ćianties ladines, spo n’unse al dedaincö cotantes, y chëstes é inće da ciafè te libri y sön internet. Śëgn fóssel ma plü da les tó ca, motivè la jënt y dantadaöt i jogn da les ćiantè y da renfreschè inće chës ćianties ladines che an à n iade imparè te scolina, scora y te val’ uniun culturala de paîsc y dla valada.
A La Pli él ruvé naôta por la presentaziun dla racoiüda nöia de 175 ćianties tröpa jënt, nia ma ćiantarins de uniuns. Danterite s’à moscedè i sonadus de stromënć sciöche orghi da man y chitares. Insciö éra jüda da cherié na bela atmosfera da stè adöm, ćiantè por ladin y inće lascè fora val’ emoziun y ona inchersciora che fej tan pert dl’anima ladina. Savan che ma le liber su ne sciafia pa da cherié chësta aurela cörta y chësc incherscimun, unse śëgn n dovëi da i dè sonn, usc y parores a chësta leteratöra tan importanta por n popul che ćiantarà bëgn ćiamò ion y saurì na ćiantia te so lingaz. (ir, lausc.it)
