P1070096b.jpg
DSC_6366.jpg
21368874_10155790363108156_6853841261410663062_o.jpg
P1070096b.jpg

Reuniun generala


SCROLL DOWN

Reuniun generala


Sentada generala y lites por l’ULVB

En vëndres sëra dales 20 él sté la sentada generala dl’Uniun Ladins Val Badia a San Martin de Tor. Al é gnü presenté y aprové le bilanz dl 2016. Lapró án presenté l’ativité fata tratan l'ann y le program preodü por le 2017. 

N momënt zentral dla sëra é spo stades les lites dl consëi nü. Oramai él bele passé trëi agn da canche l’ultimo consëi é gnü metü adöm, cun a ce Michael Moling sciöche presidënt, che do 18 agn de presidënza de Werner Pescosta á porté inant l’Uniun cun gran energia y inovaziun. Deboriada cun ël á spo lauré le consëi metü adöm da d’atres 11 porsones: Sara Moling sciöche vizepresidënta, Elmar Burchia, Martin Comploi, Mathias Crepaz, Edith Dapoz, Katharina Moling, René Pescoll, Xenia Ruggeri, Florian Tavella, Emil Valentini y Ruth Videsott.
Do trëi agn de laur intensif y ric de proiec pón ciaré zoruch cun sodesfaziun ai resultac arjunc deboriada y dilan a na buna colaboraziun danter i mëmbri dl consëi y ince dilan a na buna colaboraziun cun deplü istituziuns sciöche l’Istitut Ladin Micurá de Rü, la scora y i comuns. Zënza l’aiüt finanziar dla Provinzia Autonoma de Balsan, dla Regiun Autonoma dl Trentin-Südtirol, di comuns y dla Cassa Raiffeisen Val Badia ne fossel nia sté meso da dé fora cotan de publicaziuns y mëte a jí delü manifestaziuns. N dilan ince a düc i mëmbri scric ite, che dá n contribut finanziar y simbolich ala Uniun Ladins Val Badia.

N valgügn mëmbri dl consëi vedl dá jö süa inciaria: a d’ëi n gran dilan por so impëgn. Lapró vëgnel n valgügn mëmbri nüs, che portará ite tl consëi dl’Uniun idees nöies, creativité y vëia de fá: Samuel Clara, Natalie Dalponte y Cristina De Grandi. Le consëi nü se metará sö plü avisa en ocajiun dla pröma sentada.

N ater momënt fondamental dla sëra é stada la surandada de na onoranza a Tone Gasser. I miric por süa ativité tl’Uniun y en genaral por le lingaz ladin é tröc. Chisc án orü reconësce ti surandan na onoranza sciöche mëmber d’onur dl’Uniun Ladins Val Badia. Ël é sté mëmber dl’Uniun por plü de 30 agn. Al é ince sté cronist dl paisc da San Martin por le Sas dla Crusc por zirca 30 agn. So impëgn y so contribut incër le ladin te dlijia é zënza confrunc. Lapró ál colaboré pro tröpes publicaziuns y realisé tröpes publicaziuns religioses, musicales y d’istruziun. 

 

Le consëi atual:


Michael Moling (presidënt)
Ruth Videsott (vizepresidënta)
Elmar Burchia
Samuel Clara
Natalie Dalponte
Cristina De Grandi
Sara Moling
René Pescoll
Florian Tavella
Florian Barbolini
Alexis Bassetto

 
DSC_6366.jpg

Matinée culturala


Matinée culturala


La matinée culturala

A San Martin él en Lönesc de Pasca indô garaté n danmisdé de musiga, aorela cörta y cultura, cun la
presentaziun dl liber ”Cianties de dlijia y rimes incëria”


Ince en chësc ann á l’Uniun Ladins Val Badia metü da jí la tradizionala Matineé culturala, en Lönesc de
Pasca ai 17 d’aurí. Le danmisdé de musiga, cultura, devertimënt y cufé en compagnia é ince sté l’ocajiun
por presenté l’ultim liber de Tone Gasser: ”Cianties de dlijia y rimes incëria”.

Do le bëgngnü da pert dl presidënt dla ULVB Michael Moling, á la presentaziun dl liber metü man cun le
bel cianté dl Cor de dlijia da San Martin acompagné dal clavier y sot ala direziun de Rosamunde Irsara.
An á podü aldí deplü letöres de Tone Gasser fora dl liber che é gnüdes alternades dales composiziuns
ciantades dl cor de dlijia. Tone á ince cunté deplü coriosités sön la racoiüda de composiziuns religioses y
profanes che al á porté inant ti agn. La jënt che á implí le gran salf dl Istitut Ladin Micurá de Rü a San
Martin de Tor á ince podü ascuté sö les beles usc dl cor di mituns, che á ince stlüt jö la presentaziun cun
la ciantia ”Pice Jan” y n pice sketch teatral. Do la presentaziun é l’autur gnü rengrazié y laldé por le gran
impëgn che al á tres metü a desposiziun dl lingaz ladin, recordan che sce al vëgn incö tles dlijies dla Val
Badia cianté y perié por ladin, él gran mirit de Tone Gasser y de sües publicaziuns passades.\

Do l’aplaus gran y mirité, é la manifestaziun jüda inant cun les notes blues y swing dl grup musical ”Nik
Lee and the Marcos”. I presënc á podü se mangé na liagna blancia y ciarcé n bun gote de vin, n süch de
pom, na bira de formënt o la bira ladina, abelida da pilores fora dla storia y cultura ladina y dai dessëgns
de Manuel Riz. Sön le pice marcé di libri él ince sté da ciafé le liber nü de Tone, adöm ales atres
publicaziuns dla Uniun Ladins Val Badia. Tratan la festa él, sciöche da tradiziun, sambëgn gnü cufé cun
portaüs abelis da dic ladins da rí.

La Uniun Ladins Val Badia tëgn da rengrazié danü Tone Gasser y sambëgn düc i presënc, por avëi passé
cun nos chësc danmisdé, chi che á daidé y l’Istitut Ladin Micurá de Rü por la desponibilité.

 
21368874_10155790363108156_6853841261410663062_o.jpg

Cianté ladin en compagnia


Cianté ladin en compagnia


CIANTÉ LADIN EN COMPAGNIA... Te ostaria

Sabeda ai 23 de setëmber a La Val él gnü organisé la secunda ediziun dla manifestaziun organisaza dal Uniun di Ladins Val Badia.

Dan da cater agn él gnü dé fora dala Uniun Ladins Val Badia n liber de cianties ladines dal titul "Cianté ladin en compagnia". Al se trata dl secunt liber de na triada, te chëra che la pröma publicaziun (Cianté ladin, 2011) cöi adöm cianties profanes por cors a trëi o a cater usc y la secunda é n adatamënt a döes usc, ince fora dal repertore profan. Le terz liber indere é dötaorela tla fasa de elaboraziun (cianties de dlijia por cors a cater usc). I auturs dla trilogia é (do l’alfabet): Iarone Chizzali, Andrè Comploi, Tone Gasser y Bruno Rives. Chëstes porsones á lauré cun gran competënza y pasciun y ti á dé ala popolaziun ladina libri preziusc por tigní via y slarié fora la gran tradiziun dla ciantia ladina. 

Uniun di Ladins Val Badia á insciö ponsé a n format por valorisé sides les publicaziuns, sides le cianté dla jënt. Al é gnü l’idea da tó ala lëtra le titul dla secunda publicaziun “Cianté ladin en compagnia” y da la porté fora por les ostaries, invian düc a cianté para, sciöche al gnô fat plüdadî pro vigni bona ocajiun da sté adöm. La pröma incuntada é stada tla ostaria Sotrú a La Plí, olá che al é ince gnü fat la presentaziun ofiziala dla publicaziun. I auturs instësc á cunté dl laur doia y á condüt fora por la sëra intonan tröpes dles melodies racoiüdes tl liber. La secunda ediziun é spo stada a San Martin, tla ostaria Tasser. En chësc ann é la manifestaziun gnüda tignida sabeda ai 23 de setëmber a La Val, tl hotel Alpenrose. A daidé intoné les cianties él ste Konrad Tavella, dirighënt dl cor dles ëres da La Val a chël che la Uniun ó dí n gran dilan.
 
Un di traverc dla manifestaziun é ince chël de cianté toc nia tan presënc tla tradiziun: insciö vëgnel chirí fora öna o döes cianties manco conesciüdes y an se tol la bria de les porvé jö plü avisa, cina che ares sona bun. Dedô passon la sëra deboriada, ciantan dötes chës cianties che la jënt se damana.