Ai 30 de mà 2013 él gnü tignì la reuniun anuala di cronisć dla Val Badia che scrî le liber „Sas dla Crusc“. Te chësta ocajiun él gnü valuté la cronica por l’ann 2012 impormò gnüda fora y vigni cronist à portè dant minunghes y propostes de mioramënt por les ediziuns che vëgn.

Zacotan de avenimënć importanć sozedüs tla Val Badia tratan le 2012 à fat deventè le liber n pü’ plü gros co l’ann da denant, mo al dess varëi le prinzip dl’importanza di fać sozedüs y che é porchël da reportè. Chersciü é inće le comitê de redaziun dl „Sas dla Crusc“: Sara Moling y Isabella Ties à surantut le letorat di tesć, deperpo che Tone Gasser y Werner Pescosta à coordiné i laûrs de redaziun y stampa.

Ala fin él indô garatè na bela publicaziun cun tröpes informaziuns y retrać de porsones, uniuns y avenimënć sozedüs ti 12 paîsc dla Val Badia: chësc é ći che la fej deventè tan interessanta. Al é da s’aodè che ara röies inće chësc ann te vigni ćiasa y che tröc la toles tla man, da la lî y da ti ćiarè. Por che chësc garetes é le colauradù dla Uniun Albert Daverda bele pié ia cun n dër sbunf a partì fora sura döta la valada le liber che tröc aspetâ bele ert.

L’incuntada di cronisć é inće stada l’ocajiun por rengrazié düć canć i cronisć y i colauradus de sò laûr che costa tëmp y fadia, mo che dà inće sodesfaziun, da ponsè a tan de porsones che tôl vigni ann le liber tla man.