Por chësc altonn à la Uniun di Ladins tut sö ion la proposta dl regist badiot Simon Kostner, ormai tröp conesciü sides sciöche regist co sciöche atur, de fà n teater original adatè por pici y gragn.

„Na cassa por dui“ é la verjiun ladina de „Kikerikiste“, n tòch de teater da mituns dl autur todësch Paul Maar. Al é n tòch olach’ara nen va dantadöt dl valur y dl’importanza dl’amizizia: i protagonisć é dui amisc che vir, un dlungia l’ater, vignun te na gran cassa de lëgn; ai partësc dër tröp y passa prësc döt le dé deboriada – mo ai n’é nia dër bugn da se vijiné. Ćina ch’al röia adalerch na terza porsona che é buna da i baié sö un cuntra l’ater, da i ingianè y da ti arobè sües casses. Insciö impari tan important ch’al é da s’orëi bun, da se respetè y da tignì adöm.
De cer’ val’ se tratera de n teater da clown, cun tröpes scenes dër da plajëi, che fej deventè döt plü lisier y da ri. Impò s’adatëia le tòch dër bun por portè dant y daidé capì situaziuns y dinamiches atuales. Ara nen va nia ma de jüć danter mituns, mo inće de problems che i adulć mëss afrontè, de relaziuns danter porsones, condizionades da mobbing y bulism,...

Le tòch de teater „Na cassa por dui“ gnarà portè dant sides ai scolari tles scores elementares dla Val Badia sides ai gragn, en ocajiun de deplü sëres teatrales, da Silvia Liotto da La Ila, Egon Pescollderungg d'Al Plan y Veronica Irsara da San Ćiascian. L'artista Barbara Tavella da La Val se crüzia dl scenar y di costüms. La regia é de Simon Kostner da Corvara.

05 de otober 2012