Matiné dl Lönesc de Pasca

Da plü agn inca mët da jí a San Martin de Tor l’Uniun di Ladins dla Val Badia en colauraziun cun l’Istitut Ladin Micurá de Rü chësta manifestaziun, olache la jënt dl post á l’ocajun da ruvé adöm y da passé na bela aorela cörta en compagnia

L’evënt - che sará incö lönesc ai 2 de aurí 2018 dales 10:30 inant sön plaza dl Istitut - á danter i protagonisć le trio jazz “The Placid Notes”, metü adöm da Lucia Kastlunger (usc y percusciuns), Markus Olsacher (chitara)y da Jürgen Niederwanger (bateria). Al é da ciafé n bufé de liagnes blances y üs da Pasca cun dic ladins por na cufada. Al vëgn ince promoiü la venüda de libri tl lingaz ladin tres le marcé de libri. Na lerch ampla á en chësta ota i mituns y a d’ëi é destiné n laboratore cun ativités desvalies. Al é le “Marameo Lab” cun les trëi designers jones Alice Dellantonio, Manuela Dasser y Maddalena Aliprandi che i dá la poscibilité ai mituns da jí a completé creativamënter n liber, che á sciöche protagonist “BerbaÜ”. Vigni möt ciafa n liber a forma de ü, te chël che ël pó se dé jö y sperimenté cun formes y tecniches de dessëgn. Por la realisaziun de chësc liber pó i mituns adoré corusc dër lunc y dessigné cun i edli stlüc, cun fis, cun timbri y i.i.

Insciö, tratan che i adulc pó se gode de buna musiga en compagnia danter na cufada y l’atra, á ince i mituns la poscibilité da se devertí, da se conësce danter ëi y da passé de bi momënc te na mainira creativa.

PELEGRINAJE Sö oies

Tl pelegrinaje endrezé a Oies da l’Union Generela di Ladins, à l degan de Ampez don Ivano Brambilla y siur Pire Irsara envié i ladins a ti jì dò a les pedies de Sènt Ujöp Freinademetz

Devozion - Al ne é nia sté na miscion saurida, chela dl joen preve di verbic Ujöp Freinademetz, canche dl 1879 per jì tla Cina él pié via con la barca da sia bela val ladina, che al ne essa mai plu vedù. Al se spetova de vegnì tout ite a brac daverc dai cineisc, ma ala ne é nia steda enscì. Canche al ne s’à nia plu cruzié de i convertì, ma de i amé, é enlaouta dut mudé y é Freinademetz deventé bel plan n cineisc anter i cineisc, restan per semper te chela tera dalonc.

Al é sté l degan de Ampez sciour Ivano Brambilla, tla gliejia de San Linert, a ti recordé dantfora en curt la vita, la fede y la forza dl amour de Sant Ujöp da Oies a duc i fediei ruvés al pelegrinaje ladin, metù a jì da l’Union Generela di Ladins y endrezé chest an da l’Union di Ladis de Anpezo.
Dant pié via envers Oies, à l degan con la presidenta de la Generela Milva Mussner y les presidentes dles Unions de Ampez y de Fodom metù n ciof sun les fosses di prevesc che à lié te sia miscion la Val Badia con Ampez y Fodom: mons. Angel Dapunt, mons. Laurenz Irsara, sciur degan Bruno Majoni, y ence l’ameda ex presidenta dla Generela, Ilda Pizzinini.

I pelegrins, ruvés tla Val Badia da dutes les valedes ladines ence con corieres y pulmins, é piés via envers Oies sun la Via Crucis, te n paesaje con colours da marevueia, jan do a la bandiera ladina, a sciour Ivano Brambilla y ai preletours dles Unions di Ladins, che à dit dant per ladin. Stazion do stazion á i raprejentanc dles Unions de Ampez, Fodom, Col, Fascia, Gherdëina y Val Badia podù lieje dant o adaté a si idiom les orazions scrites per dolomitan sun l libret “Sant Ujöp Freinademetz. Na orazion sun l iade”, dé fora da l’Union Generela dl 2015.

Tl santuar é la bela messa,acompagneda da les cianties dla Schola Cantorum de Ampez, vegnuda zelebreda da sciour Pire Irsara adum con don Ivano. Sciour Pire à recordé che i ladins à n gran ejempl da ti jì do, n sant ladin che se ova da nostes valedes tout do n gran cufer. No n cufer de roba materiala, ajache Gejù tl Vangele nes à dit: jide zenza ves tò do nia, auter che la fede y l’amor per Die y per duta la jent, ence per chi cineisc che al scomenciament ne ti volova nia ben a Freinademetz, y che é a la fin stés i prums a damané sia santificazion.

Na Via Crucis y na zelebrazion duta ladina che ti à tocé l cuer di ladins ruvés a Oies ence da les autres valedes, che resta semper incantés a vedei la bela contreda y l’atmosfera dl santuar y a sentì nosta bela rejoneda ladina te duta la zelebrazion. Ence l degan de Ampez don Ivano, sceben che al ne rejona nia ladin, à recordé con comozion la beleza per vignun de podei perié te si lingaz dla oma.

A la fin à la presidenta dla Union Generela Milva Mussner rengrazié sciour Pire, sciour Ivano, la Schola Cantorum, chi che à daidé endrezé y duc i fediei che à tout pert a chest pelegrinaje. Dedò á duc podù bocolé da n bon marendel enjigné tl salf sot l santuar.

Lucia Gross por la Usc di Ladins

Marcé da Nadé y presentaziun de 3 nüs libri por mituns

Cunties tl lingaz ladin che ralegrëia y sá da insigné

Le marcé da Nadé tl Salf Laur Protezioné “La Spona”, olache al é ince gnü venü creaziuns artejanales y libri ladins, é oramai deventé na tradiziun. Te chësc contest á l’Uniun di Ladins Val Badia presenté en domënia ai 2 de dezëmber dales 14:30 trëi publicaziuns nöies. Damperfora anse podü ascuté cianties y melodies d’Advënt. La presentaziun di libri é gnüda abelida da n intrategnimënt por i mituns, che è i destinatars di libri nüs, da pert de Silvia Liotto. Chëstes trëi novités editoriales - “Pire y Paul”, “Ursin” y “Le planët dai mile corusc” - rapresentëia n arichimënt por la leteratöra dai mituns tl lingaz ladin, y dötes cantes á sciöche protagonisć i mituns, mo chisc mituns se desfarenziëia dassënn danter ëi.