La Uniun di Ladins à albü le plajëi da podëi rové ia l'ann d'ativité cun la presentaziun dl'edizun nöia dl liber "An cunta che... Liëndes ladines" che tröc aspetâ bele dî. Le liber metü adöm dales maestres Lydia Zingerle y Emma Maneschg ê gnü dè fora dl 1985 y, deache al ê n liber da plajëi, cun de beles cunties che i plej a pici y gragn, êl rové tles scores y oramai te vigni familia. Al é porchël n liber tröp conesciü, mo che n'ê plü inió da ciafè. Porchël à la Uniun di Ladins, do 27 agn, dè fora n'ediziun nöia, adatan le test ales normes de grafia atuales. L'ediziun nöia é gnüda ćiarada jö da Sara Moling, Isabella Ties y Tone Gasser.

La presentaziun dl liber é dër garatada. Le presidënt dla Uniun, Werner Pescosta, à splighé ćiodì che la Uniun di Ladins à orü dè fora la secunda ediziun dl liber. Carlo Suani à spo cuntè dl'importanza dles cunties y dles liëndes, dantadöt te n contest de mendranza sciöche chëra ladina. La maestra Annamaria Chizzali à lit dant val' cuntia y liënda fora dl liber: i mituns ascutâ pro cun interès, pro i gragn descedâ les stories bele conesciüdes de bi recorć. Hilda Pizzinini, che ê presidënta dla Uniun di Ladins dl 1985, canch'al ê gnü dè fora le pröm iade le liber, à splighé la gran importanza de n te' liber dandaìa y al dedaincö. Döta la manifestaziun é gnüda animada dales beles melodies dles döes "ganes", Marlene Schuen y Maria Moling.