N documentar sön la storia dl turism tla Val Badia
Werner Pescosta é l'autur dl documentar dé fora Uniun Ladins Val Badia, presenté en jöbia ai 24 de November a Calfosch

 

La Uniun Ladins Val Badia á presenté en jöbia ai 24 de novëmber a Calfosch tla ciasa Tita Altonle documentar video sön la storia dl turism tla Val Badia de Werner Pescosta. 

Le paisc da Calfosch, chirí fora por la presentaziun nia a caje, pó gní conscidré n pü’ la cöna dl turism tla Val Badia y Tita Alton instës á albü na pert fondamentala por le mëteman dl turism. Te chësc contest án insciö orü presenté le documentar video de Werner Pescosta, n’opera preziosa che dëida ti jí do a n svilup che tröc ne conësc nia y che n valgügn pioniers dl turism o descendënc de chisc cunta y descrí tles tröpes intervistes. 

Le presidënt Michael Moling á recordé che l’Uniun á albü na gran motivaziun da sostigní y dé fora chësc documentar deache la storia cun sües microstories é n patrimone important por la jënt y dëida capí le presënt y proieté damí le dagní. L’Uniun Ladins Val Badia ne se dá nia ma jö cun le lingaz mo plü en general cun la cultura tla Val Badia y la storia é sambëgn na pert fondamentala. Sciöche le presidënt á ciamó recordé, ó l’Uniun dialoghé cun i seturs desvalis y la jënt dla Val Badia y dé n contribut concret por renforzé la cosciënza sön nosc teritore cun süa storia passada, atuala y dl dagní. 

Werner Pescosta é l’autur dl documentar sciöche ince de ”La storia dei ladini delle Dolomiti”, dada fora te döes ediziuns y te na ediziun todëscia ”Die Geschichte der Dolomitenladiner”, da pert dl Istitut Ladin Micurá de Rü. Al á na gran pasciun por la storia, y en particolar por chëra dl post, y danter i tröc capitui fondamentai che fej fora chësta él sambëgn ince la storia dl turism. Mo sciöche Werner Pescosta dij, fossel ince chiló tröpes microstories dassënn interessantes da podëi cunté y inrescí do a funz. Tl documentar pón odëi la contrada dolomitica unica y imprescionanta, che é stada fontana d’atraziun sides por i pröms turisć co por chi d’aldedaincö, amesa chëra che al é gnü fat sö daimproia strotöres y lifc che ti pita aldedaincö al sciore na gran cualité di sorvisc che plüdadî ne podôn gnanca s’imaginé. Sciöche ara ê plüdadî vëgnel ince cunté y mostré tres intervistes y fotografies y chëstes testemonianzes dëida ciafé na prospetiva plü ampla sön le turism y sön les prospetives por le dagní. Por l’ocajiun dla presentaziun án orü mëte a jí na mësa torona cun deplü rapresentanc dl turism de seturs coliá, da döta la Val Badia, por aldí deplü punc d’odüda desvalis y por fá gní a löm n valgönes reflesciuns o problematiches atuales. La mësa torona é gnüda menada da Diego Clara, che á salpü da jí ite sön i ciamps d’interes di partezipanc y sön i aspec plü cialc. Danter i mëmbri che á dé so contribut a na discusciun plajora y interessanta orunse rengrazié Nicol Alberti, Oskar Alfreider, Felix Dapoz, Fortunato Flatscher, Ernesto Kastlunger, Renata Kostner. Le documentar video pón cumpré tl Istitut Ladin Micurá de Rü o sön le bookshop on-line, al prisc de 10 euro.