Danter i 7 y i 16 d’aurì 2011 él gnü tignì sis rapresentaziuns dl musical „Cuntra löm“, n proiet invié ia dal Sorvisc ai Jogn dla Val Badia en colaboraziun cun d’atres uniuns y istituziuns dla valada; danter chëstes él inće stè la Uniun di Ladins dla Val Badia che à sostignì l’iniziativa.

Passa 50 jogn y jones da döta la valada à tut pert al proiet, meton bele man cun les proes de dezëmber dl 2010, insignà jö da porsones espertes de teater, coreografia, costüms, ćiantè y sonè. La poscibilité de fà para val’ de te’ ti à dè tröpa ligrëza y entusiasm ai jogn che à ciafè na buna ocajiun por imparè y por se mëte ala proa dan da n publich che é stè scialdi numerus pro vignöna dles rapresentaziuns.

Inće les tematiches tratades tl tòch i pitâ ai jogn la poscibilité de se dè jö y ponsè sura tröpes chestiuns y problems dla vita d’al dedaincö. Al ê porchël na poscibilité implü por i jogn y les jones da madorì y ciafè plü segurëza sön cer’ argomënć: le vire adöm tla sozieté o deboriada cun le partner, l’amizizia, la religiun, maraties y i.i. Ara nen jô porchël de realtês che n’é nia dagnora saurides da superé, olach’an adora aiüt, mo inće de soms, dejiers, ilujiuns y ligrëzes che fej la vita tan bela...

Pro i contignüs dl toch teatral â vignun la poscibilité de dì la süa, insciö él tres indô gnü adatè aladô dles esigënzes y dles idees di partezipanć y ala fin él garatè n bel suzès.

31 de agost 2011