En lönesc de Pasca, ai 13 d’aurì, à la Uniun di Ladins dla Val Badia metü a jì, adöm cun l’Istitut Ladin Micurà de Rü y l’Uniun di Paurs Jogn da San Martin, na bela „Matinée Culturala“ a San Martin de Tor. Defata do la gran mëssa, à Chris Costa, Ale Trebo y Max Castlunger metü man de sonè, portan dant so repertore rock y jazz. „Incö unse orü portè dant bela combinaziun de musiga, che respidlëia n pü’ i corusc di üs da Pasca – à splighé Alessandro Trebo – Al me sa bel ch’al sides gnü organisé na te’ manifestaziun chilò a San Martin!“. 

Impröma à spo Carlo Suani, mëmber dla Uniun, presentè la traduziun dl romann “Liënda dl san sboaciun” de Joseph Roth che é gnüda fata da Michael Moling da San Martin, cun le letorat de Tone Gasser. Pro la manifestaziun ofiziala aldî ince le marcé di libri, por che la jënt ch’é rovada adalerch podess ti ciarè plü avisa y ince cumprè les plü beles publicaziuns dl’Uniun di Ladins, dl Istitut Ladin Micurà de Rü y dl EPL. Cherubina Moling da La Pli à metü en mostra süa bela coleziun de üs da Pasca che ëra à arjigné cà cun gran pasciun.

Sön plaza, alaleria, à i paurs jogn da San Martin intratan metü a jì la gara da cufé, olache pici y gragn s’à devertì cotan, y por parè la maiù fan y sëi, êl liagnes blances y prezes assà.
Contënt de sciöche la scomenciadia é jüda é romagnü Werner Pescosta, presidënt dl’Uniun di Ladins dla Val Badia: „i ùn orü mëte a jì na manifestaziun por n publich dër desvalì, por presentè n liber nü, mo ince por mëte fora düc i libri ladins ch’é gnüs publicà te chisc ultims agn y por cherié n’ocajiun de jì inant cun l’usanza dl cufé“, chësc so comentar.

13 d'aurì 2009