Incuntada di cronisć 2007


SCROLL DOWN

Incuntada di cronisć 2007


N valgügn di cronisc dla Val Badia che scrì le "Sas dla Crusc" en ocajiun dla riuniun: (iadedô dmc.) Mario Clara da Lungiarü, Sepl Comploi da La Val, Carlo Plazza d'Antermëia, Tone Gasser da San Martin, Giovanni Mischì da Lungiarü, Renato Paratscha d'Antermëia, (dant dmc.) Giuvani Pescollderungg d'Al Plan de Mareo, Lydia Zingerle da Corvara, Cristina Zingerle da Calfosch y Werner Pescosta de Badia.

N valgügn di cronisc dla Val Badia che scrì le "Sas dla Crusc" en ocajiun dla riuniun: (iadedô dmc.) Mario Clara da Lungiarü, Sepl Comploi da La Val, Carlo Plazza d'Antermëia, Tone Gasser da San Martin, Giovanni Mischì da Lungiarü, Renato Paratscha d'Antermëia, (dant dmc.) Giuvani Pescollderungg d'Al Plan de Mareo, Lydia Zingerle da Corvara, Cristina Zingerle da Calfosch y Werner Pescosta de Badia.

Le mertesc ai 29 de mà à i cronisc dla Val Badia tignì süa riuniun anuala por ti ciarè al liber de cronica impormò gnü fora y por fà sües valutaziuns. Le "Sas dla Crusc" à bele da val' ann arjunt so limit de grossëza: le fotografè digital à da öna na pert daidé pro che les plates gniss plü beles y da corusc y che tres plü porsones podess se ciafè invalgó tla publicaziun. Ince i tesc pîta aldédaincö plü informaziuns co dandaìa y tröpes porsones da foradecà che ciafa le liber de cronica tla man dij che te so comun o te süa valada podessi mâ se somié val' tan de bel! Tratan la riuniun él indere impò gnü fora tler che dantadöt la cualité di tesc mëss ciamò gnì miorada y la desposiziun dles informaziuns deventè plü valìa danter n paîsc y l'ater. Insciö saràl te n dagnì ince plü saurì da ciafè les informaziuns che an adora por ejëmpl por scrì la storia de na uniun, de na personalité o de n paîsc. Porchël gnaràl ciamò tignì val' curs por i cronisc a na manira che ara vais plü saurì da laurè adöm y ciamò damì co ch'al n'é gnü fat cina sëgn.

29 de mà 2007


Presentaziun dl liber "LARJËI"


Presentaziun dl liber "LARJËI"


Le vëndres ai 13 d'aurì à la Uniun di Ladins albü l'onur y le plajëi da presentè a n publich tan co mai numerus le liber "Larjëi - 1000 Jahre Bewirtschaftung der Lärche im Campilltal, Südtirol" metü adöm da Giovanni Mischì (test) y Roswitha Asche (dessëgns) cun l'aiüt de Günther Asche, l'óm de Roswitha, y de Ernst Detlef Schulze, diretur dl Max-Planck-Institut (BGC) da Jena. Pro la presentaziun che à doré oramai döes ores n'él nia mâ gnü splighé le laûr ch'é gnü fat por mëte adöm le liber, mo al é ince gnü presentè i dessëgns de Roswitha Asche te so format original y splighé avisa l'importanza che i larjëis à albü tla storia de nosta valada, sciöche resserva de lignan da frabiché, mo ince sciöche pastüra por i tiers y funtana de sostanzes da medejina che jô bun por curé tröpes maraties dles porsones y di tiers. I bosc de lersc mëss gnì zidlà y porchël taca süa esistënza ince adöm cun la colonisaziun di paîsc dla Val Badia. Ai à debojëgn de gnì curà por che ai ne crësces nia ite y le professur Schulze à splighé te na manira scëmpla y tlera sciöche ai alda da gnì curà por che süa esistënza pois gnì garantida inant. Bele le dé dan la presentaziun, ai 12 d'aurì, é n pice grup de mëmbri dl Consëi dla Uniun di Ladins y dl Ofize Parcs Naturai jü deboriada cui i verdabosc y le professur Schulze a fà n'escursciun tl larjëi da Lungiarü olache ai à podü odëi söl post ci che é gnü splighé tl liber.

13 d'aurì 2007