En lönesc de Pasca, ai 5 d’aurì danmisdé, mët la Uniun di Ladins dla Val Badia a jì, deboriada cun l’Istitut „Micurà de Rü“ y l’Uniun di Paurs Jogn da San Martin, na matinée culturala cun n program interessant.

Tla sënta dl Istitut Ladin gnaràl impröma presentè n liber nü dal titul „N pinsier adatè por vigni ocajiun...“, dè fora dal’Union Generela adöm cun la Uniun dla Val Badia. Le liber contëgn deplü cënc de idees por scrì chertes d’aodanza por ladin.

Laprò saràl da odëi na mostra de üs decorà da Cherubina Moling Ploner y d’atri intornà da Pio Rives. Por chi che à interès vëgnel ince pité n pice curs da decorè y crazè üs da Pasca.

Intratan saràl spo ince l’ocajiun da tó pert a na gara da cufé metüda a jì dai paurs jogn da San Martin y por rové ia le danmisdé en buna compagnia, gnaràl dè fora liagnes blances y val’ da bëre. Al sona y cianta: Alessandro Trebo, Max Castlunger y compagns.

1 de aurí 2010