En domënia ai 19 de dezëmber 2010 él gnü tignì a San Martin tla sënta dl Istitut “Micurà de Rü” la reuniun generala dla Uniun di Ladins dla Val Badia, olache le presidënt Werner Pescosta à portè dant la relaziun d’ativité dla uniun di ultimi cater agn. Al é gnü presentè en cört n valgönes dles iniziatives plü significatives y alzè fora la colaboraziun y le sostëgn che la Uniun à dagnora ciarè de ti dé a auturs, poeć, artisć, componisć, ćiantauturs y fotografs, che é gnüs trac ite oramai pro vignöna dles iniziatives metüdes a jì. Dantadöt ai jogn che à ćiamò debojëgn de ciafè ocajiuns por podëi se presentè al publich, ti à la Uniun pité de beles ocajiuns da mëte en mostra so talënt y so savëi.

Importantes é inće stades les publicaziuns che é gnüdes dades fora, en pert inće deache ares à corì loces, te ćiamps y seturs olache al ne n’ê denant tan co degügn tesć por ladin da tó cà. Insciö por ejëmpl tl ćiamp dla religiun y dla dlijia, olache la Uniun à ti ultimi agn dè fora i libri da dì les mësses por ladin, sföisc por tignì les ores de religiun te scora y por s’arjigné cà ai sacramënć y d’atri libri da oraziuns. I tesć é dagnora gnüs ciarà jö da porsones o da comisciuns metüdes aposta por cunt dl vësco, a na mainira che ara jiss inće da avëi les autorisaziuns nezesciares por podëi spo adorè ofizialmënter i tesć traslatà da d’atri ligac.

Do la presentaziun dl’ativité y de n valgügn datesc fora dl bilanz dla Uniun éson passà ales lîtes dl Consëi nü che portarà inant la Uniun por i proscimi trëi agn. Düć i mëmbri scrić ite regolarmënter por l’ann 2010 podô lité y gnì lità te Consëi. Aladô dles usc dades jö y compedades fora da Stephan Ploner y Paul Josef Gasser é i pröms sis mëmbri lità do ordinn de usc ciafades:

  • Werner Pescosta
  • Tone Gasser
  • Carlo Suani
  • Giovanni Mischì
  • Michaela Vittur
  • Michael Moling

Chisc sis mëmbri nominarà le presidënt y chiriarà fora les sis porsones da cooptè tla pröma reuniun che gnarà fata i pröms dis de jenà. Sambëgn gnaràl impröma tignì cunt de chës porsones che à ćiamò ciafè usc dales lîtes por ći che reverda i mëmbri da cooptè, mo al pò ince ester d’atri critêrs, sciöche p.ej. che vigni paîsc dla valada messass pordërt ester rapresentè te consëi o dles competënzes che zacai podess avëi.
Dedô él spo gnü metü a jì n pice buffet, denant co mëte man cun la presentaziun dl liber “La roda dl monn te 80 tambürli” de Max Castlunger, cun dessëgns de Maria Pezzedi.