Chësta misciun e-mail é sot a proteziun dl spam bot. Abilitëia Javascript por l'odëi.

Do la publicaziun de cater libri da stories l'ann 2006, à la Uniun di Ladins ponsè da dè fora chëstes stories inće sön CD, olache ares vëgn cuntades y acompagnades da musighes y da de vigni sort de sonns. Les usc é gnüdes registrades da Hubert Pezzei y spo sonorisades da Alessandro Trebo. Les stories é beles da ascuté sides por i mituns co inće por i gragn; ares cunta dla vita da zacan y dl monn da paur de nosta valada. I motifs musicai, i versc di tiers y d'atri sonns ch'an alda iadedô descëda l'imaginaziun y la fantasia.

Platernëia Chësta misciun e-mail é sot a proteziun dl spam bot. Abilitëia Javascript por l'odëi.

Inće les ploanies de nosta valada à intratan ciafè le sföi “Sonntag - Domenica”, arjigné ca dala Diozeja Balsan Porsenù, che ti vëgn partì fora ales families deboriada cun la “löm dla domënia”. Deache chësc sföi dess ester n aiüt por tignì alalt la domënia te nostes families, à la Uniun di Ladins dla Val Badia aratè dërt da injuntè ince la traduziun ladina y de ti pité insciö n aiüt ales families ladines che prëia y meditëia ion te so lingaz. La domënia é stada por tröc secui y é dötaurela le dé plü important te nosta cultura religiosa, acompagné da n gröm de de beles usanzes che metô plü dadî bele man cun le sonè vëies la sabeda da misdé. Inće chëstes usanzes, sc’i les tignun inant, podess nes daidé da rové ite plü saurì tl’atmosfera da festa dla domënia.

Chësta misciun e-mail é sot a proteziun dl spam bot. Abilitëia Javascript por l'odëi.

Cun l’aiüt de scolars y maestri à la Uniun di Ladins dla Val Badia albü l’ocajiun dè fora l’ajënda por l’ann de scora 2009/2010. I pröms dis de scora ti gnaràra partida fora a düc i mituns dles elementares dala terza tlassa inant. L’ajënda é n pice liber che po ti ester d’öga ai mituns por anotaziuns y apunc de vigni sort y cun dessëgns, stories y rimes déssel acompagné i scolars dal scomenciamënt cina ala fin dl ann de scora. I dessëgns y les stories dl’ajënda da chësc ann é gnüs arjignà ca dai mituns dla scora elementara da San Martin a chi ch’al ti va n bel dilan!
Por l’aiüt finanziar che nes à impormetü de dè fora chësta picia publicaziun i vàl n dilan al Assessorat por la Cultura Ladina, ala Consulta Ladina y ala Cassa Raiffeisen dla Val Badia.

Chësta misciun e-mail é sot a proteziun dl spam bot. Abilitëia Javascript por l'odëi.

Dan da val’ édema él indô gnü fora le liber de cronica dla Val Badia “Sas dla Crusc” che cunta ci ch’al é insciö sozedü ia por l’ann ti dodesc paîsc de nosta valada. I cronisc s’à indô dër porvè y à albü n bel laûr da cöie adöm les informaziuns documentades cun cotan de retrac che é en pert gnüs fac da ëi instësc y en pert gnüs metüs a desposiziun da uniuns y da privac.
Les sajuns y i agn passa ia y cun ëi ince i fac y i avenimënc, se desfantan ia te nosta memoria. Porchël pàiel la mëia da scrì sö y da fotografè la vita de nüsc paîsc. Podon ciarè do te n liber daimproìa ci ch’al é insciö sozedü, renfrescunse nosta memoria, y al vëgn indô a löm la valüta dl laûr dles uniuns y de tröpes porsones. I s’intenun ch’i ne jun nia da susc fora por chësc monn, mo ch’i gnun sostignis da tröc incër nos ia.
Al n’é nia saurì da recordè les cosses te na manira ogetiva y da alzè fora les dezijiuns y i avenimënc veramënter importanc che rovënn la storia de nüsc paîsc. Al é ince ri da odëi fora y da descrì ci ch’al sozed tl monn privat, politich y economich, les intenziuns y les speculaziuns, odon gonot impormò dedô les conseguënzes dl comportamënt dla jënt...
Cun n bel dilan a düc chi che à daidé cun articui, relaziuns y retrac, sperunse nos dla Uniun d’ester bun, ince cun nosta cronica, de mantignì via la conferta, la vita, la storia y le lian de nüsc paîsc.