Ai 21 de jügn 2012 él gnü tignì la riuniun anuala di cronisć dla Val Badia che scrì le Sas dla Crusc. Te n bel tlima él gnü valuté le liber de cronica por l'ann 2011 gnü fora da püch y n valgönes propostes por miorè tres inant la publicaziun che é tres ćiamò danter les plü chirides y aprijades dala jënt dla Val Badia. Le liber da chësc ann é garatè n pü' plü sotì co chël da l'ann passè, inće deache al é gnü valuté cun plü atenziun ći ch'al paia la mëia da mëte ite y ći nia. Por l'ann che vëgn él gnü fat fora de ti dè ćiamò plü pëis ales cosses particolares y straordinares che sozéd y/o che vëgn fates da uniuns y porsones di 12 paîsc. 

Le presidënt dla Uniun di Ladins dla Val Badia, Werner Pescosta, à tut l'ocajiun por rengrazié i cronisć y düć i colauradus por so laûr y dantadöt inće le maester en ponsiun Albert Daverda da Lungiarü che à indô fat daspavënt n bun laûr, portan le liber fora por les ćiases de döta la valada y ćinamai tles üties da munt. Por i auturs dla cronica "Sas dla Crusc" él porchël inće na sodesfaziun da ponsè a tan de porsones che tôl vigni ann tles mans le liber.

28 de jügn 2012