Conscidran l’importanza dl ćiantè tl lingaz dla uma, à i mëmbri dl Consëi dla Uniun tut sö contat cun porsones competëntes te chësc ćiamp, por odëi sc’ara foss jüda da cöie adöm les ćianties ladines conesciüdes tla Val Badia y da les scrì sö y ordiné, ponsan dantadöt inće a chi che ess messü fà le laûr pratich. 
Al é porchël stè na gran fortüna da ciafè la desponibilité de chës porsones dla Val Badia, sciöche André Comploi, Iarone Chizzali, Bruno Rives, Tone Gasser y Stephan Ploner, che à na gran esperiënza y tröpa competënza por ći che reverda la musiga y i tesć de ćianties ladines. Cun so aiüt él gnü invié ia tl 2008 le proiet cun l’obietif de publiché na racoiüda dles ćianties ladines dla Val Badia te deplü volums.

Sciöche pröm vare àn orü dè fora n liber che contëgn na racoiüda de ćianties nia religioses a plü usc por cors moscedà, cors de ëi y cors de ëres. Les ćianties abinades adöm é en gran pert nasciüdes y chersciüdes sö tla Val Badia, chël ô dì ch’ares à n test original y la musiga de n componist de nosta valada. Sambëgn él inće ezeziuns, olache la melodia é gnüda surantuta da foradecà. Tl liber él inće da ciafè composiziuns jones di ultimi agn. Danterite él ćianties da deplü versciuns y aranjamënć, por ti dè ai cors la poscibilité de se chirì fora la verjiun che ti öga y plej deplü. 

Por ti jì adincuntra ai ćiantarins ciàfon inće n CD injuntè cun dötes les ćianties te n format PDF por podëi les stampè fora impede les copié dal liber.

N iuvel important che abelësc y ti da ćiamò plü valüta a chësta racoiüda de ćianties é dessigü i dessëgns y les schizes de siur Angel Morlang (+ 2005), che é stè por tröc agn curat da San Martin, mo dantadöt inće n depenjadù, n poet y n scritur de romanns y de teater. Cun la publicaziun de chisc laûrs nia conesciüs unse inće orü le recordè y ti fà onur a na personalité importanta dl monn cultural ladin.

N bel dilan da pert dla Uniun di Ladins ti va a André Comploi y a Iarone Chizzali, responsabli dl’ediziun musicala, a Bruno Rives che à scrit jö dötes les notes sön computer, a Tone Gasser che à ćiarè jö i tesć y a Stephan Ploner che à fat l’impaginaziun y arjigné cà le liber por la stampa. N gran dilan se mirita tambëgn inće i compositurs dla musiga y i auturs di tesć che à metü sües operes prezioses a desposiziun, sciöche inće l’Assessorat por la cultura ladina dla Provinzia da Balsan, la Regiun Autonoma Trentin Südtirol y la Cassa Raiffeisen dla Val Badia che à sostignì chësc proiet dal punt d’odüda finanziar.

Le liber che é dër gnü fora gnarà presentè da d’aisciöda deboriada cun de plü cors dla Val Badia y sarà da dailò inant inće da ciafè tles botëghes y tles biblioteches.

Ann de publicaziun 2012
Parores de desvalies

Dessëgns de Angel Morlang
 391 Plates cun plü de 224 ćiantarins
Lingaz: ladin
Prisc 55.00€

Comana le liber …